ಚಂದ್ರಶೇಖರ್ ಲಿಮಿಟ್ ಎಂಬುದು ಶ್ವೇತಕುಬ್ಜ (white dwarf) ನಕ್ಷತ್ರಗಳ ದ್ರವ್ಯರಾಶಿಯ (mass) ಬಗ್ಗೆ ಖಭೌತವಿಜ್ಞಾನವು ಕಂಡುಕೊಂಡಿರುವ ಒಂದು ಪರಿಮಾಣದ ಮಿತಿಯ (limit) ಸೂಚಿ. ಈ ದ್ರವ್ಯರಾಶಿಯ ಮಿತಿಗೆ ಅದನ್ನು ಕಂಡುಹಿಡಿದ (ಭಾರತದಲ್ಲಿ ಹುಟ್ಟಿ ನಂತರ ಅಮೇರಿಕದ ಪ್ರಜೆಯಾದ) ಖಭೌತವಿಜ್ಞಾನಿ, ಶ್ರೀ ಸುಬ್ರಹ್ಮಣ್ಯನ್ ಚಂದ್ರಶೇಖರ್ (೧೯೧೦-೧೯೯೫) ಅವರ ಹೆಸರನ್ನೇ ಇಡಲಾಗಿದೆ. ಈ ಕುರಿತಾದ ಹೆಚ್ಚಿನ ಸಂಶೋಧನೆಗಾಗಿ ಅವರಿಗೆ ೧೯೮೩ರ ನೊಬೆಲ್ ಪ್ರಶಸ್ತಿಯನ್ನು ನೀಡಲಾಯಿತು.
ಶ್ರೀ ಸುಬ್ರಹ್ಮಣ್ಯನ್ ಚಂದ್ರಶೇಖರ್ ಅವರ ೧೦೭ನೇ ಹುಟ್ಟಿದದಿನದಂದು ಗೂಗಲ್ ಸಂಸ್ಥೆಯು ಅವರ ನೆನಪಿಗಾಗಿ ಚಂದ್ರಶೇಖರ್ ಲಿಮಿಟ್-ಅನ್ನು ನಿರೂಪಿಸವ ಈ ಜಿಫ಼್ ಚಿತ್ರವನ್ನು ತನ್ನ ಲಾಂಛನದಲ್ಲಿ ಪ್ರಕಟಿಸಿತ್ತು.
ಚಿತ್ರಕೃಪೆ: ಗೂಗಲ್
ಈ ನಿಯಮದಂತೆ, ಶ್ವೇತಕುಬ್ಜ ನಕ್ಷತ್ರಗಳ ದ್ರವ್ಯರಾಶಿಯು ನಮ್ಮ ಸೂರ್ಯನ (ಸೂರ್ಯನೂ ಒಂದು ಶ್ವೇತ ಕುಬ್ಜ ನಕ್ಷತ್ರವೇ) ದ್ರವ್ಯರಾಶಿಯ ೧.೪೪ರಷ್ಟು ಮಿತಿಯ ಒಳಗಿದ್ದರೆ ಮಾತ್ರವೇ ಅವುಗಳು ಸ್ಥಿರವಾದ (stable) ಶ್ವೇತ ಕುಬ್ಜಗಳಾಗಿ ಉಳಿದಿರುತ್ತವೆ. ಆ ದ್ರವ್ಯರಾಶಿಯ ಮಿತಿಯನ್ನು ಮೀರಿದರೆ (ದ್ರವ್ಯಸಂಚಯ [mass accretion] ಅಥವಾ ನಕ್ಷತ್ರಗಳ ಪರಸ್ಪರ ಘರ್ಷಣೆಯ ಕಾರಣಗಳಿಂದಾಗಿ) ನಕ್ಷತ್ರಗಳಲ್ಲಿ 'ಗುರುತ್ವಾಕರ್ಷಣೆಯ ಕುಸಿತ'ದಿಂದ (gravitational collapse) ಉಂಟಾಗುವ ಸ್ಫೋಟದಿಂದ (ಸೂಪರ್ನೋವಾ), ಒಂದೋ ಅವುಗಳು ನ್ಯೂಟ್ರಾನ್ ನಕ್ಷತ್ರಗಳಾಗಿ, ಇಲ್ಲವೇ ಕಪ್ಪುಕುಳಿಗಳಾಗಿ (black hole) ಮಾರ್ಪಡುತ್ತವೆ.