ಯುವೈ ಸ್ಕುಟಿ(UY Scuiti) ನಕ್ಷತ್ರದ ಬಗ್ಗೆ ಮನಸ್ಸಿಗೆ ಮುದ ನೀಡುವ ಕೆಲವು ಸಂಗತಿಗಳು ಯಾವುವು?

 

ಸಂಗತಿಗಳು ಯಾವುವು?

"ಯುವೈ ಸ್ಕುಟಿ" (UY SCUTI) ನಕ್ಷತ್ರದ ಬಗೆಗಿನ ಮಾಹಿತಿಗಳು ಮನಸ್ಸಿಗೆ ಮುದ ಕೊಡುತ್ತವೆಯೋ, ಮನಸ್ಸನ್ನ ತಲ್ಲಣ ಗೊಳಿಸುತ್ತವೆಯೋ ಅಥವಾ ತಲೆಯೊಳಗಿರುವೆ ಬಿಟ್ಟಂತಾಗುತ್ತದೆಯೋ ನನಗೆ ಗೊತ್ತಿಲ್ಲ.

ಆದರದು ನಮ್ಮ ಊಹೆಗಿಂತ ಬಹಳ ದೂರವೇ ಇದೆ ಅನ್ನುವುದಂತೂ ಸತ್ಯ.

ಈ ನಕ್ಷತ್ರದ ಬಗೆಗಿನ ಒಂದು ರಾಶಿ ಮಾಹಿತಿಗಳು ಅಂತರ್ಜಾಲದ ಪುಟದೊಳಗಿವೆ. ಅವುಗಳಲ್ಲಿ ಕೆಲವನ್ನ ತಮ್ಮೊಂದಿಗೆ ಹಂಚಿಕೊಳ್ಳುತ್ತೇನೆ. ಅವುಗಳ ಸತ್ಯಾಸತ್ಯತೆಗಳ ಬಗ್ಗೆ ನನಗರಿವಿಲ್ಲ. ಆದಷ್ಟೂ ನಿಖರವಾದ ಮಾಹಿತಿಯನ್ನೇ ಕೊಟ್ಟಿದ್ದೇನೆಂಬುದು ನನ್ನ ನಂಬಿಕೆ.

ಓದಿ ನೋಡಿ.

• ಈ ನಕ್ಷತ್ರ ಮೊದಲು ಪತ್ತೆಯಾಗಿದ್ದು ೧೮೬೦ ರಲ್ಲಿ, ಜರ್ಮನಿಯ ವಿಜ್ಞಾನಿಗಳು ಇದರ ಮಾಹಿತಿದಾರರು.
• ಆದರೂ ಅದರ ಬಗೆಗಿನ ಸ್ವಲ್ಪ ನಿಖರವಾದ ಮತ್ತು ಹೆಚ್ಚು ಸ್ಪಷ್ಟವಾದ ಮಾಹಿತಿ ದೊರಕಿದ್ದು ೨೦೧೨ ರಿಂದೀಚೆಗೆ.

ನಮ್ಮ ಭೂಮಿ ಮತ್ತು ಸೂರ್ಯನ ನಡುವಿನ ಹೋಲಿಕೆಯನ್ನ ತಲೆಯೊಳಗಿಟ್ಟುಕೊಂಡು ಅದರ ಜೊತೆ "ಯುವೈ ಸ್ಕುಟಿ" ಯನ್ನ ಹೋಲಿಕೆ ಮಾಡಿಕೊಂಡರೆ ಸ್ವಲ್ಪ ಲೆಕ್ಕಾಚಾರ ತಲೆಗಿಳಿದೀತು.

• "ಯುವೈ ಸ್ಕುಟಿ" ಯು ನಾವಂದುಕೊಂಡ ಅತಿ ದೊಡ್ಡ ನಕ್ಷತ್ರ ಸೂರ್ಯನಿಗಿಂತ ಹತ್ತು ಪಟ್ಟು ಭಾರವಾಗಿದೆ.
• ಅದರ ವ್ಯಾಸ ಸೂರ್ಯನ ವ್ಯಾಸಕ್ಕಿಂತ ೧೭೦೦ ಪಟ್ಟು ದೊಡ್ಡದು.
• ಸುತ್ತಲೂ ಅನಿಲಗಳಿಂದಲೇ ತುಂಬಿರುವ ಇದು ಸದಾ ಅಲ್ಲಾಡುತ್ತಲೇ ಇರುವುದರಿಂದ ಅದರ ಗಾತ್ರ ವ್ಯತ್ಯಾಸವಾಗುತ್ತಲೇ ಇರುತ್ತದೆ.
• ಅದರ ವ್ಯಾಸವನ್ನ ಕಿಲೋಮಿಟರ್ ನಲ್ಲಿ ಹೇಳುವುದಾದರೆ ಅದು ಎರಡು ನೂರು ಕೋಟಿ ಕಿ.ಮಿ. ಗಿಂತ ಹೆಚ್ಚು!
• ಭೂಮಿಯ ವ್ಯಾಸ ೧೨೭೫೦ ಕಿ.ಮಿ.
• ಸೂರ್ಯನ ವ್ಯಾಸ ೧೪ ಲಕ್ಷ ಕಿ.ಮಿ.
• ಈ ರಾಕ್ಷಸ ಗಾತ್ರದ ನಕ್ಷತ್ರ "ಯುವೈ ಸ್ಕುಟಿ" ಯೊಳಗೆ ನಮ್ಮ ೩೭೦ ಕೋಟಿ ಸೂರ್ಯರನ್ನ ತುಂಬಬಹುದು.
• ಸೂರ್ಯನಲ್ಲಿ ಹತ್ತುಲಕ್ಷ ಭೂಮಿಯನ್ನ ತುಂಬಬಹುದು.
• ಬೆಳಕಿನ ವೇಗದಲ್ಲಿ ಇದರ ಸುತ್ತ ಒಂದು ಬಾರಿ ಸುತ್ತಲು ಏಳು ಗಂಟೆ ಬೇಕು.
• ಅದೇ ವೇಗದಲ್ಲಿ ಸೂರ್ಯನನ್ನ ಸುತ್ತಲು ಕೇವಲ ೧೪.೫ ಸೆಕೆಂಡ್ ಸಾಕು! ಅದರ ಸುತ್ತಳತೆಯ ಅರಿವು ಆಯಿತಲ್ಲ!
• ಬೆಳಕಿನ ಚೇಗ ಸೆಕೆಂಡಿಗೆ ೩ ಲಕ್ಷ ಕಿ.ಮಿ.
• ಸಾಮಾನ್ಯ ವೇಗದ ವಿಮಾನದಲ್ಲಿ "ಯುವೈ ಸ್ಕುಟಿ" ಯನ್ನ ಸುತ್ತಲು ಸುಮಾರು ೧೦೮೬ ವರ್ಷಗಳು ಬೇಕಾಗಬಹುದು!
• ಸೂರ್ಯನನ್ನ ಸುತ್ತಲು ಅದೇ ವಿಮಾನ ಸುಮಾರು ೨೦೫ ದಿನಗಳನ್ನ ತೆಗೆದುಕೊಳ್ಳುತ್ತದೆ.
• ಅದೇ ವೇಗದ ವಿಮಾನದಲ್ಲಿ ಭೂಮಿಯನ್ನ ಸುತ್ತಲು ಸುಮಾರು ಎರಡು ದಿನ ಬೇಕು.

ಒಂದುವೇಳೆ ನಡೆದುಕೊಂಡು ಸುತ್ತುವ ಆಸೆಯಿದ್ದರೆ,

• ಯುವೈ ಸ್ಕುಟಿ ಯನ್ನ ಒಂದು ಬಾರಿ ಸುತ್ತಲು ೩೨೦೦೦೦(೩.೨ಲಕ್ಷ) ವರ್ಷಗಳು ಬೇಕು.
• ಭೂಮಿಯಯನ್ನ ಸುತ್ತಲು ೧.೫ ವರ್ಷ ಬೇಕು.
• ಸೂರ್ಯನನ್ನ ಸುತ್ತಲು ೧೫೪ ವರ್ಷ ಬೇಕು.

ಯುವೈ ಸ್ಕುಟಿಯನ್ನ ತಲುಪಲು ಬೇಕಾಗುವ ಸಮಯ ಎಷ್ಟು?

• ಭೂಮಿಯಿಂದ ಸೂರ್ಯನ ದೂರ ಸುಮಾರು ೧೫ ಕೋಟಿ ಕಿ.ಮಿ. ಅಥವಾ, ಅದನ್ನ ೮ ಜ್ಯೋತಿರ್ನಿಮಿಷ ಅನ್ನಬಹುದು.
• ಅದೇ ಯುವೈ ಸ್ಕುಟಿಯ ದೂರ ೫.೨೧ ಜ್ಯೋತಿರ್ವರ್ಷ ಕಿ.ಮಿ. ಅಂದರೆ ೫೦ ಟ್ರಿಲ್ಲಿಯನ್ ಕಿ.ಮಿ ಗಿಂತ ಹೆಚ್ಚು.
• ಬೆಳಕು ಪ್ರತಿ ಸೆಕೆಂಡಿಗೆ ಮೂರು ಲಕ್ಷ ಕಿ.ಮಿ ಚಲಿಸುತ್ತದೆ. ಅದೇ ಬೆಳಕು ಒಂದು ವರ್ಷದಲ್ಲಿ ಚಲಿಸುವ ದೂರವನ್ನ ಒಂದು ಜ್ಯೋತಿರ್ವರ್ಷ ಅನ್ನುತ್ತಾರೆ.
• ಅದರ ಅತಿಯಾದ ಹೊಳಪು ಮತ್ತು ಶಾಖದ ಪ್ರಖರತೆಗೆ ಅದರ ಸುತ್ತಲೂ ಯಾವುದೇ ಗ್ರಹಗಳಿಗೂ ಉಳಿಗಾಲವಿಲ್ಲ.
• ನಮ್ಮ ಸೌರಮಂಡಲದಂತೆ ಅದು ಇಲ್ಲ. ಅದು ಅಲ್ಲಿಯ ಏಕಮೇವ ಚಕ್ರಾಧಿಪತಿ.