ತ್ವರಿತ ಹವಾಮಾನ ಬದಲಾವಣೆಗಳು, ಜಾಗತಿಕ ತಾಪಮಾನದಲ್ಲಿ ಹೆಚ್ಚಳ ಮತ್ತು ಜನಸಂಖ್ಯೆಯ ಬೆಳವಣಿಗೆಯೊಂದಿಗೆ, ಪ್ರಪಂಚದಾದ್ಯಂತ ಅನೇಕ ದೇಶಗಳಲ್ಲಿ ಕುಡಿಯಲು ಯೋಗ್ಯವಾದ ನೀರಿನ ಕೊರತೆಯಿದೆ.
ನೀರಿನ ಮಟ್ಟ ಕ್ರಮೇಣ ಕುಸಿಯುವುದು ಗಂಭೀರ ಕಳವಳಕ್ಕೆ ಕಾರಣವಾಗಿದೆ, ಏಕೆಂದರೆ ಇದು ಉಪಯೋಗಿಸಲು ಯೋಗ್ಯವಾದ ನೀರಿನ ಕೊರತೆಗೆ ಕಾರಣವಾಗುತ್ತದೆ. ಮಾತ್ರವಲ್ಲದೆ ಕರಾವಳಿ ಪ್ರದೇಶಗಳಲ್ಲಿ ಇದು ಪ್ರದೇಶದ ಲವಣಾಂಶದಲ್ಲಿ ಅಸಮತೋಲನವನ್ನು ಉಂಟುಮಾಡುತ್ತದೆ.
ತ್ವರಿತ ಕೈಗಾರಿಕೀಕರಣ ಮತ್ತು ರಾಸಾಯನಿಕ ತ್ಯಾಜ್ಯವನ್ನು ಜಲ-ದೇಹಗಳಲ್ಲಿ ವಿಲೇವಾರಿ ಮಾಡುವುದು ನದಿಗಳು, ಸರೋವರ ಮತ್ತು ಜಲಮೂಲಗಳ ಮಾಲಿನ್ಯಕ್ಕೆ ಕಾರಣವಾಗುತ್ತದೆ. ಇದು ಜಾಗತಿಕ ಸಮಸ್ಯೆಯಾಗಿದ್ದು, ತ್ವರಿತ ಪರಿಹಾರದ ಅಗತ್ಯವಿದೆ. ಈ ಗ್ರಹದಲ್ಲಿ ಶುದ್ಧ ನೀರಿನ ಸರಬರಾಜನ್ನು ಹೆಚ್ಚಿಸಲು ಸಾಧ್ಯವಿಲ್ಲ. ಆದ್ದರಿಂದ ಪರ್ಯಾಯ ವಿಧಾನವನ್ನು ಹುಡುಕಬೇಕು. ಅಂತಹ ಒಂದು ವಿಧಾನವೆಂದರೆ ಮಳೆನೀರನ್ನು ಕೊಯ್ಲು ಮಾಡುವುದು.
ಮಳೆನೀರು ಕೊಯ್ಲು ಎನ್ನುವುದು ಮಳೆಗಾಲದಲ್ಲಿ ಮಳೆನೀರನ್ನು ಸಂಗ್ರಹಿಸಿ ನೀರಿನ ಕೊರತೆಯ ಅವಧಿಯಲ್ಲಿ ಬಳಸುವುದು. ಸಾಮಾನ್ಯವಾಗಿ ಹೇಳುವುದಾದರೆ, ಇದು ಮಾನವನ ಬಳಕೆಗಾಗಿ ಮಳೆನೀರನ್ನು ಹಿಡಿದು ಕೂಡಿಟ್ಟು ಬಳಸುವ ಪ್ರಕ್ರಿಯೆಯಾಗಿದೆ.
ಮಳೆನೀರನ್ನು ಒಣ ಋತುವಿನಲ್ಲಿ ಅಥವಾ ಬರಗಾಲದಲ್ಲಿ ಬಳಸುವ ಉದ್ದೇಶದಿಂದ ಸಂಗ್ರಹಿಸುವ ತಂತ್ರವೇ ಮಳೆನೀರ ಕೊಯ್ಲು ಎಂದು ವಿವರಿಸಬಹುದು.
ಮಳೆನೀರು ಕೊಯ್ಲು ಸುಲಭ ಮತ್ತು ಆರ್ಥಿಕ ಮಾರ್ಗವಾಗಿದೆ. ಮನುಷ್ಯರ ಪರಿಸರ ಕಾಳಜಿ ಹೆಚ್ಚಾದಂತೆ, ಮಳೆನೀರು ಕೊಯ್ಲು ಜನಪ್ರಿಯತೆಯನ್ನು ಗಳಿಸುತ್ತಿದ್ದು ಪರಿಸರ ಸಂರಕ್ಷಣೆ ಮತ್ತು ನೈಸರ್ಗಿಕ ಸಂಪನ್ಮೂಲವನ್ನು ರಚನಾತ್ಮಕವಾಗಿ ಬಳಸಿಕೊಳ್ಳುವಲ್ಲಿ ಉಪಯುಕ್ತವಾಗಿದೆ.
